ಆರೋಗ್ಯ ಮಾಹಿತಿ : ನೀವು ಪ್ರತಿದಿನ ಮದ್ಯ ಸೇವಿಸುತ್ತೀರಾ? ಪ್ರತಿದಿನ ಸ್ವಲ್ಪ ಮದ್ಯ ಕುಡಿದರೂ ಅಪಾಯವೇ? ಈ ಕುರಿತು ಹೊಸ ಅಧ್ಯಯನಯೊಂದು ಎಚ್ಚರಿಕೆ ನೀಡಿದೆ. ಈ ಅಧ್ಯಯನ ನೀಡಿದ ಆಘಾತಕಾರಿ ಮಾಹಿತಿ ಇಲ್ಲಿದ್ದು, ಸದ್ಯ ಮದ್ಯಪಾನ ಮತ್ತು ಹೃದಯ ಆರೋಗ್ಯದ ಕುರಿತು ತಿಳಿಯಲೇಬೇಕಾದ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಇತ್ತೀಚಿನ ವರ್ಷಗಳಲ್ಲಿ ಹೃದಯಾಘಾತ ಮತ್ತು ಪಾರ್ಶ್ವವಾಯು ಪ್ರಕರಣಗಳು ವೇಗವಾಗಿ ಹೆಚ್ಚುತ್ತಿರುವುದು ಜನಸಾಮಾನ್ಯರಲ್ಲಿ ಮತ್ತು ವೈದ್ಯಕೀಯ ವಲಯದಲ್ಲಿ ಆತಂಕಕ್ಕೆ ಕಾರಣವಾಗಿದೆ. ಹಿಂದೆ ಹೆಚ್ಚಾಗಿ ವಯೋವೃದ್ಧರಲ್ಲಿ ಕಂಡುಬರುತ್ತಿದ್ದ ಈ ಸಮಸ್ಯೆಗಳು ಇತ್ತೀಚಿನ ದಿನಗಳಲ್ಲಿ ಚಿಕ್ಕಮಕ್ಕಳು ಹಾಗು ಯುವ ಜನತೆಯಲ್ಲೂ ಸಾಮಾನ್ಯವಾಗುತ್ತಿವೆ.
ಇಂತಹ ಸಂದರ್ಭದಲ್ಲಿ ಪ್ರತಿದಿನ ಅಲ್ಪ ಪ್ರಮಾಣದಲ್ಲಿ ಮದ್ಯ ಸೇವಿಸುವ ಅಭ್ಯಾಸವೂ ರಕ್ತದೊತ್ತಡವನ್ನು ಹೆಚ್ಚಿಸಿ, ಹೃದಯ ಸಂಬಂಧಿ ಗಂಭೀರ ಕಾಯಿಲೆಗಳ ಅಪಾಯವನ್ನು ಹೆಚ್ಚಿಸಬಹುದು ಎಂಬ ಮಹತ್ವದ ಮಾಹಿತಿ ಹೊಸ ಅಧ್ಯಯನವೊಂದರಿಂದ ಹೊರಬಂದಿದೆ.
ಮದ್ಯಪಾನವನ್ನು ಕೆಲವರು ಒತ್ತಡ ನಿವಾರಣೆ ಅಥವಾ ಸಾಮಾಜಿಕ ಜೀವನದ ಭಾಗವೆಂದು ಪರಿಗಣಿಸುತ್ತಾರೆ. ಆದರೆ ದೀರ್ಘಕಾಲದವರೆಗೆ ನಿಯಮಿತವಾಗಿ ಮದ್ಯ ಸೇವಿಸುವುದರಿಂದ ದೇಹದ ಮೇಲೆ ನಿಧಾನವಾಗಿ ಆದರೆ ಗಂಭೀರ ಪರಿಣಾಮಗಳು ಉಂಟಾಗುವ ಸಾಧ್ಯತೆ ಇದೆ ಎಂದು ಆರೋಗ್ಯ ತಜ್ಞರು ಎಚ್ಚರಿಸುತ್ತಿದ್ದಾರೆ.
ಇದ್ನು ಓದಿ : ಒಮ್ಮೆ ಹಾವು ಕಚ್ಚಿದರೇ ಎಷ್ಟು ವಿಷ ದೇಹ ಸೇರುತ್ತೆ ಗೊತ್ತಾ? ಬೆಚ್ಚಿಬೀಳಿಸುವ ವಿಡಿಯೋ ವೈರಲ್!
ವಿಶೇಷವಾಗಿ ರಕ್ತದೊತ್ತಡ ಹೆಚ್ಚಾಗುವುದು ಹೃದಯದ ಮೇಲಿನ ಒತ್ತಡವನ್ನು ಹೆಚ್ಚಿಸಿ, ಮುಂದೆ ಹೃದಯಾಘಾತ ಅಥವಾ ಪಾರ್ಶ್ವವಾಯುವಿನಂತಹ ಜೀವಕ್ಕೆ ಅಪಾಯಕಾರಿಯಾದ ಸ್ಥಿತಿಗಳಿಗೆ ಕಾರಣವಾಗಬಹುದು.
ಪ್ರತಿದಿನ ಮದ್ಯ ಸೇವಿಸಿದರೆ ರಕ್ತದೊತ್ತಡ ಏರಿಕೆಯಾಗುತ್ತದೆಯೇ?
ಅಮೆರಿಕನ್ ಹಾರ್ಟ್ ಅಸೋಸಿಯೇಷನ್ನ Hypertension ಜರ್ನಲ್ನಲ್ಲಿ ಪ್ರಕಟವಾದ ಅಧ್ಯಯನದಲ್ಲಿ ಅಮೆರಿಕ, ಜಪಾನ್ ಹಾಗೂ ದಕ್ಷಿಣ ಕೊರಿಯಾ ಸೇರಿದಂತೆ ವಿವಿಧ ದೇಶಗಳ 19,548ಕ್ಕೂ ಹೆಚ್ಚು ಜನರ ಆರೋಗ್ಯ ಮಾಹಿತಿಯನ್ನು ಹಲವು ವರ್ಷಗಳ ಕಾಲ ವಿಶ್ಲೇಷಿಸಲಾಗಿದೆ.
ಸಂಶೋಧಕರು ಮದ್ಯಪಾನ ಮತ್ತು ರಕ್ತದೊತ್ತಡದ ನಡುವಿನ ಸಂಬಂಧವನ್ನು ಪರಿಶೀಲಿಸಿದಾಗ, ಪ್ರತಿದಿನ ಮದ್ಯ ಸೇವನೆಯ ಪ್ರಮಾಣ ಹೆಚ್ಚಿದಂತೆ ಸಿಸ್ಟೋಲಿಕ್ ರಕ್ತದೊತ್ತಡ (ಹೃದಯ ರಕ್ತವನ್ನು ದೇಹದ ವಿವಿಧ ಭಾಗಗಳಿಗೆ ಪಂಪ್ ಮಾಡುವಾಗ ಉಂಟಾಗುವ ಒತ್ತಡ) ಕೂಡ ಕ್ರಮೇಣ ಹೆಚ್ಚುತ್ತಿರುವುದು ಕಂಡುಬಂದಿದೆ.
ಮಿತ ಪ್ರಮಾಣದ ಮದ್ಯವೂ ಸಹ ಸುರಕ್ಷಿತವಲ್ಲ :
ಅಧ್ಯಯನದ ಮತ್ತೊಂದು ಪ್ರಮುಖ ಅಂಶವೆಂದರೆ, ಅತಿಯಾಗಿ ಮದ್ಯ ಸೇವಿಸುವವರಲ್ಲಷ್ಟೇ ಅಲ್ಲ, ಮಿತ ಪ್ರಮಾಣದಲ್ಲಿ ಮದ್ಯ ಸೇವಿಸುವವರಲ್ಲಿಯೂ ರಕ್ತದೊತ್ತಡ ನಿಧಾನವಾಗಿ ಏರಿಕೆಯಾಗುತ್ತಿರುವುದು ಕಂಡುಬಂದಿದೆ.
ಈ ಸುದ್ದಿ ಓದಿ : ಮಳೆ ನೀರಿನಲ್ಲೇ ಬೈಕ್ ಚಲಾಯಿಸುತ್ತೀರಾ? ಹಾಗಾದ್ರೆ ಈ ವೈರಲ್ ವಿಡಿಯೋ ಒಮ್ಮೆ ನೋಡಿ.!
ಈ ಬದಲಾವಣೆ ಆರಂಭದಲ್ಲಿ ಅಷ್ಟಾಗಿ ಗಮನಕ್ಕೆ ಬಾರದಿದ್ದರೂ, ವರ್ಷಗಳ ಕಾಲ ಮುಂದುವರಿದರೆ ಹೃದಯ, ರಕ್ತನಾಳಗಳು ಹಾಗೂ ಮೆದುಳಿನ ಮೇಲಿನ ಒತ್ತಡ ಹೆಚ್ಚಿಸಿ ಹೃದಯಾಘಾತ, ಪಾರ್ಶ್ವವಾಯು ಮತ್ತು ಇತರ ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯವನ್ನು ಹೆಚ್ಚಿಸಬಹುದು ಎಂದು ಅಧ್ಯಯನ ತಿಳಿಸಿದೆ.
ಪುರುಷರು ಮತ್ತು ಮಹಿಳೆಯರಲ್ಲಿ ಪರಿಣಾಮ ಹೇಗೆ?
ಸಂಶೋಧನೆಯ ಪ್ರಕಾರ, ಪುರುಷರಲ್ಲಿ ಡಯಾಸ್ಟೋಲಿಕ್ ರಕ್ತದೊತ್ತಡ (ಹೃದಯದ ಎರಡು ಬಡಿತಗಳ ನಡುವಿನ ಒತ್ತಡ) ಹೆಚ್ಚಾಗಿರುವುದು ಸ್ಪಷ್ಟವಾಗಿ ಕಂಡುಬಂದಿದೆ.
ಆದರೆ ಇದೇ ಪ್ರಮಾಣದ ಪರಿಣಾಮ ಮಹಿಳೆಯರಲ್ಲಿ ಅಷ್ಟಾಗಿ ಕಂಡುಬರಲಿಲ್ಲ. ಆದಾಗ್ಯೂ, ಮಹಿಳೆಯರಿಗೆ ಯಾವುದೇ ಅಪಾಯವಿಲ್ಲ ಎಂಬುದಲ್ಲ. ಆರೋಗ್ಯದ ಮೇಲೆ ಮದ್ಯದ ಪರಿಣಾಮ ವ್ಯಕ್ತಿಯಿಂದ ವ್ಯಕ್ತಿಗೆ ಬದಲಾಗಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಸಂಶೋಧಕರು ಹೇಳಿದ್ದೇನು?
ಅಧ್ಯಯನದ ಪ್ರಮುಖ ಲೇಖಕರಾದ ಮಾರ್ಕೊ ವಿನ್ಸೆಟಿ, ಮಿತ ಪ್ರಮಾಣದ ಮದ್ಯಪಾನವೂ ರಕ್ತದೊತ್ತಡದ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತದೆ ಎಂಬುದು ಅಧ್ಯಯನದಿಂದ ಸ್ಪಷ್ಟವಾಗಿದೆ ಎಂದು ತಿಳಿಸಿದ್ದಾರೆ.
ಇದನ್ನು ಓದಿ : ಬೆಳಗ್ಗೆ ಎದ್ದ ತಕ್ಷಣ ಈ 7 ಲಕ್ಷಣಗಳು ಕಾಣಿಸುತ್ತಿವೆಯೇ? ಇವು ಕಿಡ್ನಿ ಸಮಸ್ಯೆಯ ಮುನ್ನೆಚ್ಚರಿಕೆ ಆಗಿರಬಹುದು!
ಅವರ ಪ್ರಕಾರ, ಮದ್ಯ ಸೇವಿಸದವರೊಂದಿಗೆ ಹೋಲಿಸಿದರೆ ಮಿತ ಪ್ರಮಾಣದ ಮದ್ಯ ಸೇವನೆಯಿಂದ ಯಾವುದೇ ವಿಶೇಷ ಆರೋಗ್ಯ ಲಾಭ ಕಂಡುಬಂದಿಲ್ಲ. ರಕ್ತದೊತ್ತಡ ಹೆಚ್ಚಲು ಮದ್ಯ ಮಾತ್ರ ಕಾರಣವಲ್ಲದಿದ್ದರೂ, ಇದು ಪ್ರಮುಖ ಅಪಾಯಕಾರಿ ಅಂಶಗಳಲ್ಲಿ ಒಂದಾಗಿದೆ. ಆದ್ದರಿಂದ ಸಾಧ್ಯವಾದಷ್ಟು ಮದ್ಯಪಾನವನ್ನು ಕಡಿಮೆ ಮಾಡುವುದು ಅಥವಾ ಸಂಪೂರ್ಣವಾಗಿ ತ್ಯಜಿಸುವುದು ಉತ್ತಮ ಎಂದು ಸಲಹೆ ನೀಡಿದ್ದಾರೆ.
ತಜ್ಞರ ಅಭಿಪ್ರಾಯ :
ಟುಲೇನ್ ವಿಶ್ವವಿದ್ಯಾಲಯದ ಸಾರ್ವಜನಿಕ ಆರೋಗ್ಯ ವಿಭಾಗದ ಪ್ರಾಧ್ಯಾಪಕರಾದ ಪಾಲ್ ವೆಲ್ಟನ್, ಈಗಾಗಲೇ ಸ್ವಲ್ಪ ಮಟ್ಟಿನ ಅಧಿಕ ರಕ್ತದೊತ್ತಡ ಹೊಂದಿರುವವರಲ್ಲಿ ಮದ್ಯದ ಪರಿಣಾಮ ಇನ್ನಷ್ಟು ಸ್ಪಷ್ಟವಾಗಿ ಕಂಡುಬಂದಿದೆ ಎಂದು ಹೇಳಿದ್ದಾರೆ. ಹೈ ಬಿಪಿ ಇರುವವರು ಮದ್ಯ ಸೇವನೆ ಬಗ್ಗೆ ಹೆಚ್ಚು ಎಚ್ಚರಿಕೆ ವಹಿಸುವುದು ಅತ್ಯಗತ್ಯ.
ಯಾವ ಪ್ರಮಾಣದ ಮದ್ಯ ಅಪಾಯಕಾರಿ?
ಅಧ್ಯಯನದ ಪ್ರಕಾರ,
- ದಿನಕ್ಕೆ ಸುಮಾರು 12 ಗ್ರಾಂ ಆಲ್ಕೋಹಾಲ್ ಸೇವಿಸುವವರಲ್ಲಿ ಸಿಸ್ಟೋಲಿಕ್ ರಕ್ತದೊತ್ತಡ ಸರಾಸರಿ 1.25 mmHg ಹೆಚ್ಚಾಗಿದೆ.
- ದಿನಕ್ಕೆ ಸುಮಾರು 48 ಗ್ರಾಂ ಆಲ್ಕೋಹಾಲ್ ಸೇವಿಸುವವರಲ್ಲಿ ಅದು 4.9 mmHg ವರೆಗೆ ಏರಿಕೆಯಾಗಿದೆ.
- ಇದೇ ಪ್ರಮಾಣದ ಮದ್ಯ ಸೇವಿಸಿದ ಪುರುಷರಲ್ಲಿ ಡಯಾಸ್ಟೋಲಿಕ್ ರಕ್ತದೊತ್ತಡವೂ ಸರಾಸರಿ 3.1 mmHg ಹೆಚ್ಚಿರುವುದು ಕಂಡುಬಂದಿದೆ.
ಈ ಅಂಕಿ-ಅಂಶಗಳು ದೀರ್ಘಾವಧಿಯಲ್ಲಿ ಹೃದಯದ ಮೇಲಿನ ಒತ್ತಡ ಹೆಚ್ಚುವ ಅಪಾಯವನ್ನು ಸೂಚಿಸುತ್ತವೆ.
ಈ ಸುದ್ದಿಯನ್ನು ಓದಿ : ರೈಲ್ವೆಯಲ್ಲಿ 6,557 ತಂತ್ರಜ್ಞ ಹುದ್ದೆಗಳ ನೇಮಕಾತಿ; 10ನೇ, ITI, ಡಿಪ್ಲೊಮಾ ಅಭ್ಯರ್ಥಿಗಳಿಗೆ ಅವಕಾಶ.
ಹೃದಯವನ್ನು ಹೇಗೆ ಆರೋಗ್ಯವಾಗಿಡಬೇಕು?
ತಜ್ಞರ ಪ್ರಕಾರ,
- ಹೃದಯವನ್ನು ಆರೋಗ್ಯವಾಗಿಡಲು ಮದ್ಯಪಾನವನ್ನು ನಿಯಂತ್ರಿಸುವುದು ಅಥವಾ ತ್ಯಜಿಸುವುದು ಮೊದಲ ಹೆಜ್ಜೆಯಾಗಿದೆ.
- ಜೊತೆಗೆ ಪೌಷ್ಟಿಕ ಆಹಾರ ಸೇವನೆ, ನಿಯಮಿತ ವ್ಯಾಯಾಮ, ಧೂಮಪಾನದಿಂದ ದೂರವಿರುವುದು, ರಕ್ತದೊತ್ತಡ ಮತ್ತು ಕೊಲೆಸ್ಟ್ರಾಲ್ ನಿಯಂತ್ರಣದಲ್ಲಿಡುವುದು ಹಾಗೂ ಆರೋಗ್ಯಕರ ದೇಹದ ತೂಕವನ್ನು ಕಾಪಾಡಿಕೊಳ್ಳುವುದು ಅತ್ಯಂತ ಮುಖ್ಯ.
- ಇದೇ ವೇಳೆ, ನಿಯಮಿತ ಆರೋಗ್ಯ ತಪಾಸಣೆ ಮಾಡಿಸಿಕೊಳ್ಳುವುದು ಮತ್ತು ರಕ್ತದೊತ್ತಡವನ್ನು ಸಮಯಕ್ಕೆ ತಕ್ಕಂತೆ ಪರೀಕ್ಷಿಸಿಕೊಳ್ಳುವುದರಿಂದ ಹೃದಯಾಘಾತ ಹಾಗೂ ಪಾರ್ಶ್ವವಾಯು ಅಪಾಯವನ್ನು ಗಮನಾರ್ಹವಾಗಿ ಕಡಿಮೆ ಮಾಡಬಹುದು.
ಇತ್ತೀಚಿನ ಎಲ್ಲಾ ಪ್ರಮುಖ ಸುದ್ದಿಗಳನ್ನು ಇಲ್ಲಿ ಓದಿ
Disclaimer: ಈ ಅಧ್ಯಯನವು ಮದ್ಯಪಾನ ಮತ್ತು ರಕ್ತದೊತ್ತಡದ ನಡುವಿನ ಸಂಬಂಧವನ್ನು ಸೂಚಿಸುತ್ತದೆ. ವೈಯಕ್ತಿಕ ಆರೋಗ್ಯ ಸ್ಥಿತಿ, ಜೀವನಶೈಲಿ ಹಾಗೂ ಇತರ ವೈದ್ಯಕೀಯ ಕಾರಣಗಳಿಂದ ಪರಿಣಾಮಗಳು ಬದಲಾಗಬಹುದು. ಯಾವುದೇ ಆರೋಗ್ಯ ಸಮಸ್ಯೆ ಅಥವಾ ಮದ್ಯಪಾನಕ್ಕೆ ಸಂಬಂಧಿಸಿದ ಸಲಹೆಗಾಗಿ ವೈದ್ಯರ ಸಲಹೆ ಪಡೆಯುವುದು ಸೂಕ್ತ.
